Friday, September 17, 2010

Brownout sa amin

Ano ang mas mahalaga kuryente o tubig?

Kung sa atin sa Pinas ay nagkakaroon ng crisis sa tubig dito naman sa amin sa Sharjah, UAE ay nagkakaproblema naman sa kuryente.

photo courtesy of gulf news
Mga dalawang buwan na rin siguro ang nakakaraan ng nagkaroon ng malawakang rotating brownout dito. Pero hindi ito ang una dahil mga ganitong buwan din ng nakaraan na taon ay nakaranas din ng brownout.

Sa tindi ng temperature na mga 45 celcius, halos hindi na ako makahinga dahil walang umiikot na hangin sa flat. Ang mas nakakaawa ay ang dalawang maliit kong mga tsikiting na pawis na pawis sa tindi ng init. Hindi lamang problema ang kawalan ng kuryente kundi problema rin na baka mawalan ng tubig dahil hindi gagana ang motor ng tubig. At dahil kalilipat lang namin sa bagong flat ay hindi pa kami kinakabitan ng koneksyon para sa gas sa pagluluto kaya electric stove ang gamit namin.

photo courtesy of gulf news
Walang maibigay na paliwanag ang SEWA o Sharjah Electric and Sewage Authority (parang pinagsamang Meralco at MWSS sa Pinas) tungkol sa halos mga isang linggong ring problema. Kahit kabi-kabila ang sandamukal na reklamo ng maraming tao pinagkibit balikat lang ito ng SEWA. 

Sa palagay ko, sa laki ng demand ng kuryente dahil sa kainitan noon ay di kayang suplayan ang mga ito. Ang resulta, maraming negosyo ang nalugi lalo na yong mga groceries. 

Ayon din sa bali balita, malaki daw ang pagkakautang nitong SEWA.
Sa gabi maraming tao ang tumatambay sa labas o sa may park. Ang iba naman ay minabuting magsiksikan sa City Center Sharjah na may nakaabang na generator. Dahil may mga area na 8 oras ang walang kuryente.

photo courtesy of gulf news
photo courtesy of gulf news



Isang kaibigan ang nakasabayan naming magtambay sa City Center Sharjah isang hapon. Sabi anya bumaba pa daw sya galing sa 14th floor dahil hindi gumana ang elevator dahil sa brownout. Buti nalang at nasa 1st floor lang kami nakatira kaya hindi mahirap bumaba.

Ang style naman namin para makaiwas sa init ay magtawag ng mga kaibigan na may kuryente at makiusap na tumambay ng ilang oras. 
Sa ngayon balik normal na ulit ang kuryente. Palagay ko nahanapan na rin ng solusyon ng SEWA ang problema. shukran!

Wednesday, September 15, 2010

Peso vs. Dollar


Pababa ang trend ng peso kontra dolyar sa ngayon. Ayon sa balita sa TV patrol noong isang gabi malamang magiging P 42 = $ 1 ang palitan sa loob ng anim na buwan. Dagdag pa ng isang ekonomista, posibleng magiging P 40 = $ 1 pa daw ang palitan dahil sa lumalakas na ekonomiya ng Pilipinas.

Sa ganitong sitwasyon, malamang nakangiti si P-Noy. Bumabalik na kasi ang kompiyansa ng mga namumuhunan sa Pinas. Dahil siguro mas kampante silang si P-Noy ang presidente na parang walang kabalak balak mangurakot sa pwesto.

Pero sa isang OFW na katulad ko, ito ay isang masakit na balita at mas masakit sa bulsa. Dahil ibig sabihin mas lalaki ang kailangang ipadala para matustusan ang gastos sa Pinas.

Naalala ko pa noong mga 2004, ang palitan ng dollar noon ay halos umabot sa P 56 at ang dirhams naman ay mga P 15. Kaya naman sa kakarampot kong sahod noon ay nabayaran ko ang tatlong "over-used" credit cards kong naiwan sa Pinas. Pesteng credit card talaga. Masarap gumastos pero kalbaryong bayadan.

Dahil na rin sa inflation, tumaas na lahat ang mga bilihin hindi lamang dito sa Dubai pati na rin sa Pinas. Naalala ko pa na ang dinatnan kong isang pirasong grilled chicken na kasing laki ng kalapati sa Spinneys Supermarket ay 5 Dirhams. O-M-G! After 6 years ang dating manok na ga-kalapati ay hindi pa rin lumaki. Pero doble na ang presyo sa halagang 10 Dirhams.

"What-to-do", sabi nga ng mga Pana. Kaya kahit lumaki ang sahod halos ganon pa din ang purchasing power ng pera. Minsan kulang pa ngang pang grocery ang nakabudget na pera.

Ganon talaga. Hindi naman pwedeng ibato kay Obama ang sisi kung bakit ba kailangang may ganitong pagtaas at pagbaba ng dollar o peso.

Sa mga katulad kong OFW, kunting tiis lang makakaraos din tayo.